噚日動漫節另一個引人注目嘅環節，就係《一拳超人》埼玉聲優古川慎訪港同 fans 見面。佢仲不設中場休息時段，一次過簽晒 80 幾張簽名版！

古川慎（Makoto Furukawa）喺見面會上表示，雖然第一次嚟香港，但對於周街都係高樓大廈、夜景同埋飲茶印象十分之深。另外佢聯同主辦單位木棉花 Muse 宣布，Viu TV 將會喺 2017 年正式播放《一拳超人》，仲呼籲 fans 多多支持。好多 fans 問古川慎，如果佢擁有埼玉咁嘅 power，最希望做啲乜？古川慎就話最希望可以一拳拆樓，咁就可以破世界紀綠。但佢強調就算真係咁，都只會揀冇人嘅樓。

木棉花喺每年動漫節都有搞聲優 / 製作人訪港簽名會，所以今年專程嚟港嘅古川慎，知道台下 80 幾名忠實 fans 已經等緊，於是立即開始逐個簽。佢仲話唔駛中場休息，唔好畀佢停、一次過簽晒。

最後古川慎同全場 fans 擺出埼玉出拳招牌甫士，嚟一個大合照。

其實古川慎喺出席見面會前，同本港傳媒進行專訪，講咗唔少對《一拳超人》埼玉呢個角色嘅睇法，同埋覺得聲演埼玉有冇難度，請留意我哋稍後嘅報導。